Dr Umweldgalendr vom Umweldamde

Elfriede von dr Voochelweide meent: Dr Umweldgalendr muss sinn!

Wenns Jahr so ze Ende jeht, bass’ch immer off, denn jehm die von dr Schtadt begannt, dass mr ’n Umweldgalendr widder offen Meldeamd odder offen Hanserink for een Eiro abfassen gann. ’sis zwar noch nich vorjegomm, dass’ch keen jekricht hädde, awwer ich sehe zu, dass’ch mr bahle off de Soggen mache un nich etwa ze schbäte gomme un Neese mache.
Dr Umweldgalender hänkt immer in dr Giche am selm Blazz, drhinger zooch ma dr Rooch vom Gichenherd ab, da is noch heide dr Schornschteen drhinger. So krichts Format enne bassende Schdelle.
Wer an Halle so sein Herze jehänkt hat wie iche, sich for de Verjangheet indressiert, sich freit, wenne was erfährt, wasse noch nich wusste iwwer unse Schtadt, muss den Galender einfach hamm. Jedes Jahr schteht der unner een eksdra Dehma. De Dehm‘ sinn vielfältch. Un so is jedes Schticke wie e Gabiddel in ee’m Buche sozesaachen. In‘ Vorjahrn jinks ma um de Jeolojie, ma um Viechter, diede im Feichten lehm, wie Moorkäcker (so sacht mr hier for Fresche), kleene Rebbdieljen un Griechdiere, denn widder iwwer Veechel, diede hier bei uns brieten, ooch iwwer Beime,Schtreicher un Flanzen, Jewässer, Wilddiere, Fohdos von frieher un wies jezz aussieht un Orte, wo mr was erlehm gann. Von dem Dehma for 2015 war’ch so bejeistert, Dehma Altberchbau, dass’ch jlei Schticker fimfe abfasste, so hawwich jlei scheene Jeschenke for ausjewanderte Hallenser, diede in Meck /Pomm., im Sauerland odder Sachsen wohn‘. Zum Berchbau hawwich enne besonnere Beziehunk, velleicht schreiwich da e anneres Mah e Schmieschen driwwer.
Der Haubtjrund forn Galender is nadierlich dr Umweldschuzz un dass endlich ale bejreifen, wie mr ’n Mill drennt un Jebrauchtes wo, wie un wann entsorchen gann. Mir hamm nur eene Umwelt un missen die schitzen, weil se unersezzbar is un de Leide nach uns brauchen se ooch.
Ich weeßes nich annersch ze saachen: E jroßes Dankescheen an alle Macher vom Fachbereich Umweld bis Drugghaus Schitze, for mich is der Galender enne jroße Freide- jedes Jahr!

Un e Dibb insjeheim: Entsorcht den nich am Jahresende, die wern beschtimt emah andegwarisch schbäder jehandelt wie heidzetaache de Halische Moatshefte aus’n 50er Jahrn!