Jewusst wie – Elfriedes Kaffeerunde

Jewusst wie!

In dr lezzt’n Woche war’ch mah widder dran, also an dr Reihe, meine lie’m Freindinn’ einzeladen. Das jeht immer so reihum. Da drink’mer scheen Gaffee, schie’m uns was Leggerfetzches in’ Schnawel, bekwasseln de Neiigkeeten, schbieln ooch mah enne Runde Romme, schtehn ooch iwwer de neisten Wehwehchen, ’s Alder jeht je an uns ooch nich vorbei.
Nuh war’ch awwer finanzjell e Häbbchen schwach off dr Brust, also Schwindsucht im Bordjuchhe. ’s gann je vorgomm’, ooch bei mir, die’chs eejentlich aus’n Effeff gann- mitten Moos rumzewertschaften. Awwer’s war so, dass de beschtellte Margiese vorzeitch jegomm’war, in dr Breete iwwern jansen Balgong. Na wenn schon, denn schon.! Woannersch hawwich jesehn, dass die nur eene hatten iwwer de Fensterbreete, na das sieht deoch ärmlich aus, wahr? Tja, un nuh war das ehhmd e bisschen viel off eenmah so aus dr Lameng 7 Hunderter hinzebläddern un ans Sarjjeld wollt’ch nich jehn.
Gorz un jut, ich machte nich soo een großen Offriss wie sonst, nur drei Guchensorden schtatt fimfe, Gaffee vom Disgaunder (denn mir schlawwern was weck!) un nich von Jagobbs, Gaffeesahne nich de deierste. Un for e Bluumschtruz offen Dische fehltes Moos ooch. Da wusst’ch mr awwer ze helfen, ich schtellte wench’sten zwee Wasen mit Wasser hin, velleicht bringt mir eene e baar Bluum’ mit. Eene Wase offen Disch un eene in de Schrangkwand.
Keener hat Bluum’ mitjebracht…. Awwer mir war schon was einjefalln. Na, warte!!
Bei’n Gaffeedrinkn fing’ch e bedeitungsvolln Blick zwischen zween off, das jink eindeitch off de leere Wase zerick. Jesaacht hammse awwer nischt.
Na, der Nachmiddach is so vrloofen wie immer, jelacht jede Menge, jedratscht un von frieher erzählt, ihr wisst- wenn de Richtchen zesamm’ sinn. Meine eiserne Reserve hammer noch alle jemacht, enne kleene Flasche Eierlikeer. Un denn musst’ch doch noch e kleen’ Imbiss „reichen“, bevor die widder abjedammbt sinn. Also abjereimt un nei offjebrezelt. Nuh ließ
sich nich vrmeiden, dass da und dort enne Wurschtpelle anfiel un dort enne Gäserinde un ooch Zellefahnbabbier vom Fleischsalade.
Nuh wollt’mer abreim’. Un erjendwie musst’ch je nuh mah rausgomm …wejen den leern Wasen …un mehr.
Fix drickt’ch jeder enne Serwjette in de Dalbschen un sachte:“ So, nuh backt mah die Speiserester ( ja, mir sachen Rester un nich Reste) scheene ein un nehmt’se mit heeme.
Nach Sichtungk dr vrblifften Jesichter hawwich denn noch drzu jesaacht „ Jaja, ihr wohnt doch in Halle, da misster das doch schone jewehnt sinn! De Hawack (Hallesche Verkehrs- AG) machts doch ooch so!
Un Gredel un Gerda, zu Eiern Blicken vorhin wejen meiner leer’n Wase! Ooch da hawwich mr e Beischbiel an unsrer Schtadt jenomm! Gucktemah- an dr Melanchdohnschtraße un an dr Neibauerschtraße un wer weeß wo noch- da schtehn ooch unbeflanzte Bluumkiewel, weil de Schtadt schbarn muss un keen Jeld for Bluum hat. Allerdinks wächst da Unkraut drinne un Abfälle sinn da ooch mitenmang. Soweit bin’ch awwer nich jejang’.“
Die sinn vor lachen nich mehr jeworrn.
Un eene sachte denn noch:“Ja, un als dr Rannische fertch war, da hammse ooch jesacht, dasse da Bluumkiewel hinschtelln wolln, weil der so nack’ch aussieht- da wart’mer heide noch droff!“