hallefreind 77 scheind je nich von hier ze sein, e Zujereisder, e Hallunke sozesaachen, mr ergennds an dr Schbrache, aber de Zujezochnen hamm je merschdens de besden Jedanken in de Inzucht von dr Hallorndrubbe rinjetraachn.
Dr ahle Rive war je ooch nich von hier, dän hamm d Hallenser extra von Gruuß Brassel – Breslau off hochdeitsch- jehoold, weilse nich mehr klarkaam mitn Jelde un alles. Ich bin je ooch von dorte jekomm wordn, jäbe mr ooch Miehe wie Rive, dasde alles scheen werd hier. Ans Saaleufer ungene, wo sichs Riveufer schimpt, wär ich ä bar scheene Bänke offstelln, da kammer dann mid seiner Holden droffsitzn, ins Saalemaium kneisten un über de scheene Juchenzeit simuliern.
Aber ich bin widder ma abjeschwiffen vons Dehma, s jehd je ums Schdadtbad, mir solls je eejendlich ejal sinn, denn ich jehe da nich nein mit mein Wansde, aber de scheen halleschen Weiber wolln je sich in dr Weiberhalle zeijen un rumherpaddln.
Elfriede, da brauchsde Dr geene Sorjen machn, dr Obee had das alles off seinn langken Tisch jezoochn un zur Chefsache jemachd. Weil e sein´n Bauleitn nich gloobd, ware je selber mitn Maurerhammer dort un had am Putze rumjeklobbd.
Gondrollinsdanzen hadde ooch jenuch, enne janze Gondrolldrubbe mit dr allerallerhechsden Erfahrungksstufe hadde extra einjeschdelld, damid nischd schiefjehd. Un weil nu d Gommunalwahln vor dr Türe schdehn, hammsen ausn Schdadtrad ooch nochema Damp jemachd, dasses endlich was werd mit dr Weiberhalle von Schdadtbade.
Mir missn uns dasderwejen keene Sorjen machn,wenns heite nischd werd, werds morjen.
Wolli vom Kreizvorwerke