Uff hallsch: das Jemehre ums Schtadtbade

15. April 2014 | Glosse | 3 Kommentare

Ich hawwe mr im zardn Alder ’s Schwimm‘ im Schtadtbade alleene beijebracht un ooch meiner Engkelin, obwohl Leibzcherin,drvonerzählt, ’ser dord de Ankst vorm Diefen jenomm un se dord ’s Seeferdchen ablejen lassen. Ich hawwe enne besondre Beziehungk zu dän Jebeide un weeß noch, was in der Einjankshalle ohmne drummerum for e Deckst an dr Wand schtand.
Stadtbad10
Der jink so:
„Im Frieden erdacht, im Krieje vollbracht“ un Ihr schreibts je sellwer, wann se das scheene Jebeide jebaut hamm un wie lange se drzu brauchden: 3 Jahre. Un heide schaff mr nichemah enne Rebberaduur in dr Hälfde dr Zeid. Gann da der Dockter Wiejand nichemah mehr off de Duwe dricken, der is doch sonst so ficks, lässt eijenmächtch Beime rausfezzen, wo andre sich in acht jenomm hamm, weil sie widder an der Schleefe Renn‘ machen wollden? Awwer der Obee rennt je bloß an Land schbordlich rumher un weeß nich, wie scheene das im Maium is. Besonnersch de Äldren wissen die gleene Fraunhalle ze schäzzen, weils da wärmer is als driem in dr sojenannden „Männer“halle.O Jottojott, wodran licht’n das in unsern Halle, dassde alles so lankwierich is? ’sis je fast wie bein Fluuchhafen BER. Am Jelde doch nich, die hatten je frieher ooch wenich. Odder werd velleicht zeviel im Schtadtbarlement jekwasselt? Die missen doch sowas wie e Schbordausschuss hamm. Leide, werdt emah agdiever un handelt alle so, wie sichs dr Dockter Wiejand vorjenomm‘ hat bei Amtsantritt, wollte der nich Rive nacheifern odder wem? Der hats je ooch nich alles alleene jedeichselt un hatte sein‘ Rat, der’n beischtand.
Ach iwwrijens,schtand Rive ooch damals under Anklaache wejen erjendewas emah? Wisstch niche. Awwer was hätten jemacht, wenn? Breisfraache!!!

Ja,ja,ja, heert off, Leide, ich hawwe den ooch jewählt, seine Webbseide schien mr iwwerzeijend, bardeilos, dachtch, allso mah dodahl unabhängig, awwer er hat mr enddeischt.Meine schriftlich iwwerjemnen „Schbarvorschläje“ wo’e anfink,wollte weiderleiten, ich hawwe nachjehakt, schriftlich Andword jekricht un–nischt is bassiert For mich de Schlussfoljerungk Nummer eens: s’is nich weider jeleidt worden, Nummer zwee: s’is weider jeleidt worden un nischt bassiert. Gennde das sinn, dass dr Obee geene Gondrollschtelle hat odder dassen de Audoridäd fehlt odder was?
Mudlos gennde mr wern…

Elfriede

Print Friendly
3 Kommentare
  1. Profilbild von Hallefreund77
  2. Profilbild von wolli
  3. Profilbild von Hallefreund77

Kommentar schreiben