Uff Hallesch: Reenlichkeet in dr Schtadt un Erndezeid

16. Juni 2014 | Glosse | 1 Kommentar

Wenn’ch so in‘ lezzd’n zwee Woch’n ins Jleisbette von der Bimmel jelinst hawwe, bein Abdrock’n von mein Jescherre mach’ch das immer,schtellt’ch feste, dass de Erndezeid naht.

Offen Felde fänkt je im Juni ooch dr Roggen schon an abzeschterm, werd ungene jelb. Awwer die Jerste, links und rechts vom Jleisbette, diede schon enne Hehe von unjefähr fimmenzwanzch Zendemedern hatte,schdannd mächtch da un war ooch schon jelb. Meise-Jerste nadierlich, nach den kleen grau’n Diern mit den lanken Schwänzen beniemt. Wenn enne Bahn vorbei gamb, wedelte das wie in e Gornfeld, nur nich so hoch. Sah jar nich so schlecht aus.

Erjendeene Inschdiduzzjon, Hawack, Schtadtreinjunk, awwers leeft je doch alles unner een Jesammtnaam, muss denn e Befehl jejehm hamm, das Zeich abzesensen. Bletzlich war die eene Seide jemäht. Un e baar Dache schbäder, Freidach woh, ooch die annere. Awwer die sah aus, Resthalme links un rechts stehn noch heide hoch un zeujen drvon, wie eilich der Golleje Feierahmd machen wollde.

Wer nuh awwer mewent, dassde nach dr Mahd das Zeich drocken zesamm jeharkt werd, der errt sich. Nee, das Zeich werd ’n Wind iwwerlassen un der vrdeelt’s gleichmäß’ch odder nich in dr jansen Schtraße un im Jleisbette. Un was in dr woochenden Jerste vrborchen war: Babbier, Dembodaschendiecher un ooch andrer Mist, der liecht noch da. So wer’ch bein Abdrock’en immer abjelenkt un hawwe was zum Simmeliern. For das Weckreim‘ von dem noch daliejenden Miste is wahrscheinlich e andrer Golleje zuschtändch, denkch mah.

Beim Warden off de Bimmel hawwich nämich ooch emah jesehn, wie eener mit e kleen Audochen de Babbiergerwe jeleert hat. Der druuch Händschken wejen dr Hückjene, leerte erscht den den Babbiergorb off der een Sede, denn den annern off der annern Seide, wobei e durchs Jleisbette jeschtiwwelt is. Der rumliejende Graam im Jleisbette jink den nischt an wahrscheinlich, daderfor muss denn e andrer ran. Odder ob der Babbiergorbleerer velleicht e Hecksenschuss hatte? Das is je ooch was jans Ferchterliches!

Elfriede

Print Friendly
Ein Kommentar
  1. Profilbild von Traurich

Kommentar schreiben